فيلم عبارة عن تخمة سينمائية ومع دسامة وأهمية محتواه حسيت دماغي بطريقة لا إرادية بدأت تتفاعل بطريقتها الخاصة واللي حصل كالآتي :

* بعد المشهد الإفتتاحي العبقري، أول حاجة جت في بالي فيلمBARDO والمشهد الإفتتاحي وبرغم تقييمي له بالعلامة الكاملة، لكني إستحضرت الفروق الجوهرية و أدركت إن إيناروتوا عمل فيلم عن السينما بس عمله لنفسه وإختار الذاتية، بينما شازيل عمل فيلم عن السينما وإختار الجمهور وهنا نقطة لصالح شازيل ( الفيلمين ماعجبوش النقاد)

* إعتراف صغير كده برغم عدم حبي لمارجو، لكنني أقر بموهبتها وشطارتها وإن ماكانش فيه أي ممثلة غيرها تنفع تقوم بالدور بالدرجة دي من الجنون.

* أول ما ظهر براد بيت، عالطول إفتكرت Once Upon A time in Hollywood وبرغم إنه كان فيلم عن السينما، لكن تارانتينوا إختار حقبة وحيدة وشازيل إختار تاريخ وهنا نقطة تانية لشازيل.

* في مشاهد الحفلة الأولانية ورقص مارجو مع آنا ماي وونج نط قدام عيني فيلم Mulholland Drive وقلت لنفسي أخيرا نزلوا كتالوج الشرح والتعليمات وماحدش هايشتم فيه تاني.....( طبعا إفتكرت Inland Impire برضوا بس ربنا ستر )

* في مشهد العرض الخاص لفيلم مارجو إفتكرت عالطول فيلم The Artist والشبه الكبير جدا بينها وبين Bejo .

* لما مارجو سمعت رأي المنتجين فيها إفتكرت فيلم Sunset Boulevard و What Ever Happened to Baby Jane وإستحضرت كل مشاهدهم ومعاناة المشاهير لما بتنتهي فترات سطوعهم و تألقهم.

* برغم إن تركيز شازيل كان علي تحديات الإنتاج والتمثيل والتصوير ، إلا إن بداية ظهور الأفلام الناطقة ومشهد تخلص شركة Kinoscope من لافتات فواصل الأفلام الصامتة وإحلال السيناريو الناطق كان سبب رئيسي في إنني إفتكرت واحد من أفلامي المفضلة جدا Parton Fink.

* أفلام تانية كتير زي Citizen Kane و Holy Motors و Mank كانت بتفرض نفسها مع تتابع الشخصيات بإختلاف ادوارها ومحاولاتي المرهقة جدا بالتوصل للعلاقة والرابط بين أبطال الفيلم و أبطال هوليوود في مراحلها المختلفة والمستوحي منهم شخصيات الفيلم.

طبعا كنت مبسوطة ومستمتعة وعاملة أحلي دماغ من موسيقي الجاز واللي في رأيي الشخصي اكتر نوع مزيكا فيها حياة ونشاط وطاقة.

برغم إن محاولة إنتقاد الفيلم هاتكون إفترا وبتر ، لكن كان نفسي شازيل يتعرض في رحلته كمان لتحديات كتابة السيناريوا لإنه من أهم مسببات نجاح أو فشل الأفلام وغالبا ده في رأيي العيب الوحيد، طول مدة الفيلم بالنسبالي ماكانش عيب، لإن المونتاج كان اكتر من رائع ونجح إنه يقحم المشاهد داخل الأحداث بمستوي متوازن جدا من التشويق والإثارة ، المشاهد الفجة مش قادرة أصدر حكم عليها لإنني مش عارفة هل هي كانت واقع بيحصل وللا خيالات من دماغ شازيل.....بس بصراحة كانت مزعجة خصوصا مشاهد توبي ماجوير.