Twenty-Four Eyes

Twenty-Four Eyes ★★★★★

يبدو ان الفيلم دا هعتبره بجانب فيلم
Black Rain 1989
لشوهي إيمامورا كأفضل فيلمين يابانيين تناولوا الحرب .. الفيلمين مختلفين في أسلوبهم و في الغاية اللي عاوز يوصل لها كل مخرج ، لكن الفيلمين بيتفقوا في شعور بيحيط و يسيطر عليهم ألا هو شعور عام بالإنهيار و التحلل .. في (بلاك رين) هو تحلل مادي و إمراض جسماني حقيقي لشخصيات الفيلم جراء تعرضهم للقنبلة .. أما هنا فالتحلل إنساني، انهيار نفسي بطئ للأطفال خلال سنين الحرب ، بتحاول مُعلمتهم التخفيف من وطأة الحرب عنهم و حمايتهم نفسياً في مواجهة الكوارث ، و دفعهم قدر الإمكان للتفكير بإيجابية ، لكن لا يلبث أن يصيب هذا التحلل جميع شخصيات الفيلم بما فيهم المُعلمة

فيه نقطة مهم الاشارة ليها و هي ان الفيلم دا بتظهر قيمته لو قارنته مع فيلم كينوشيتا السابق
Army 1944
هو فيلم مجهول شوية لكنه مهم، لأن فيلم (أرمي) هو بروباجاندا صريحة للإمبراطور الياباني و للحرب لحشد الجنود قدر الإمكان للمشاركة .. أما على العكس فهنا الفيلم مضاد للحرب
Anti-war
و دا شئ مفهوم و معتاد .. لأن فيلم (أرمي) كان في خضم الحرب العالمية فمن غير المناسب انه يكون فيه دعوة مضادة للحرب ، و ان أفلام ال(أنتي وور) دي بتبدأ تظهر بعد انتهاء الحرب لما كل طرف يبدأ يشوف خسايره و يحس فعلاً ان الموضوع مكنش مستاهل فتبدأ تظهر قصص و أفلام بترفض الحرب بشكل غير مباشر عن طريق عرض مآسي لحيوات الناس في وقت الحرب .. لكن اللي عجبني هنا ان فيلم
24 eyes
كان أشبه بتقديم اعتذار من كينوشيتا عن فيلمه السابق (أرمي) اللي زي ما قلت كان بروباجاندا حربية بحتة ، لأنه مش بس بيعرض أثر الحرب على الناس لكنه هنل كمان خلى شخصية البطلة تتمرد و تعلن رفضها صراحة للحرب و على حد قولها تُفضِّل لأبنائها و تلاميذها ان يعيشوا في هناء بدلاً من الذهاب للحرب و التضحية من أجل الوطن ، و دا كان شئ مرفوض وقتها طبعاً و بيتم اعتباره خيانة

نقطة المقارنة بين الفيلمين دي بشوفها مهمة فعلا بتبينلك التحول في تناول المخرج خلال 10 سنين من فيلم بروباجاندا حربي لفيلم رافض للحرب

أخيراً ف اللي فات دا ينطبق على النصف الأول من الفيلم بس ، لأن النصف التاني بتبدأ تكتمل فيه معالم الفيلم و تشكله كتحفة فنية .. النصف التاني بتبدأ الجميلة (هيديكو تاكاميني) أدائها التمثيلي يتعملق بشكل رهيب.. و
الفيلم بيمتلئ بفيض من المشاعر بشكل صعب وصفه ..و بتبدأ كمتفرج تُقدِّر قيمة البناء و السرد البطئ اللي اعتمد عليه الفيلم و بتبدأ تطغى الميلودراما اللي أنا في الأساس عدو ليها لكني حقيقي بضعف أمام الميلودراما اليابانية .. شئ عظيم و الله يا أستاذ كينوشيتا

Karim liked these reviews