Drive My Car

Drive My Car ★★★½

لأني شاهدته المرة الأولى بجودة رديئة نوعًا ما،قررت أشاهده للمرة الثانية بجودة أفضل عشان أقدر أحكم عليه بشكل أفضل وأعطيه حقه، وصراحة مدة الفيلم الطويلة على نمط السرد الهادي بشدة خلى المشاهدة صعبة عليّ شوي واجبرني هالشي اني اوقف أكثر من مرة

الفيلم ثقيل وفيه عدد كبير من الرمزيات اللي للأمانة ما قدرت افككها كلها وهالرمزيات عالغالب ماهي من النوع اللي اذا ما فهمتها ما بتقدر تفهم الفيلم ولكن بتكون مساعدة لك انك تستوعب نفسيات الشخصيات وتتعمق بمشاعرهم أكثر، وعالغالب هالرمزيات موجودة في الحوارات اللي كتابتها مميزة بوضوح وهي تقريبًا العنصر الأقوى بالفيلم واللي كثير منها تقدمت بطريقة مسرحية شعرية 

للأمانه فيه شوية فريمات مذهله ومع هدوء القصة اللي يوصل لدرجة البرود حسيت اني رحت برحلة تأملية رايقة وعشت اللحظات اللي كثير منها مخيم عليها جو الكآبة ولكن بطريقة شاعرية مليانة عواطف وانسجمت معها ووصلت لي كثير من مشاعر الشخصيات

مجملًا فيه كثير من الاشياء الفريدة من نوعها ولكن للأسف انه فيه اوقات كثيرة البرود الزايد ما خدمها، قد تكون مهمة للبناء ولكنها خلتني افصل شوي عن استمتاعي ، ومع ذلك اخر نص ساعة عجبتني جدًا وممكن لأني عرفت انه قرب ينتهي فأعطيته كامل تركيزي

Ibrahim liked these reviews