Carne

Carne ★★★★

Carne 1991 / لحم

تجربة فرنسية أخري مع جاسبر نو

تروي تلك التجربة القصيرة قصة الجزار خائب الحظ الذي تلطمه موجات الحياة دونما سكون بمختلف ألوان المصائب .. تلك القصة التي سيستكملها المخرج فيما بعد في أولي تجاربه الطويلة .. تجربة ترسم الخطوط العريضة لحكاية أقرب للفاجعة التي لا نريد أن نتذكرها

للي مش واخد باله فالفيلم هو الجزء الأول من ثلاثية .. الجزء الثاني بتاعها والأهم هو فيلم "أقف وحيداً" واللي بيحكي صلب القصة وفصلها الأهم ثم المشهد الأول من فيلم "المعكوس" اللي بيحكي فيه البطل مصيره واللي وصله

هنا الفيلم مجرد خطوط عريضة زي ما يكون كان فكرة مجنونة وغامضة في ذهن المخرج حب يطرحها علي أمل أنها ممكن يطرحها بوضوح أكبر في المستقبل .. وهو ما حدث

طبعاً بشاعة الفيلم الثاني لا تتضاهي الحقيقة وكمية الصدمة اللي فيه تفوق التحمل .. وكذلك الأفكار والسرديات اللي فيه ثرية ودسمة أوي .. عقدة أوديب ونظرة علي حال المهمشين في تسعينيات فرنسا واليأس والرغبة في الأنتحار والتساؤلات الحادة حول الوجود والأخرين .. كان وجبة دسمة أوي .. أقدر أقول أن الفيلم ده أو الفيلم الأول يعني هو عبارة عن عينة بسيطة منها .. هو مجرد بيحكي جذورها

الفيلم في حد ذاته عمل تجريبي مؤلم وصادم أيضاً ومشبع بحالة من العنف والإحباط قوية أوي .. الوجه البشع لباريس .. ده باين في كل حاجة حتي أختيار الستات .. اللي كان من ضمنهم زوجة المخرج بالمناسبة .. مفيهمش حسناء باريسية واحدة .. واقع بشع وقبيح من شوارع لمهن لشخوص لأسلوب حياة لمظاهر وجود .. عجلة إستغلال لا تتوقف ولا تنضب .. كله بينهش في كله

مشهد محاولة العامل إستغلال البنت المعاقة والإعتداء عليها رغم أنه صوره بشكل مش جارح لكنه مؤلم نفسياً ومحطم للغاية .. حتي مشاهد زي تقطيع اللحمة وذبح الأحصنة والولادة المخرج صنع منها حالة بشعة عبر الإضاءة والظلال والإستخدام المبالغ فيه للون الأحمر والدم والإضاءة الصفراء اللي بتصيبني شخصياً بالتوتر والغثيان

هي تجربة صعبة بس نقدر منها نشوف أسلوب جاسبر في بداياته وتجسيد مهم لهواجسه وعقده